Kuvendi i Republikës së Kosovës

Kuvendi i Republikës së Kosovës zgjodhi presidenten e vendit

04.04.2021

Kuvendi i Republikës së Kosovës, në një seancë të jashtëzakonshme, të drejtuar nga kryetari Glauk Konjufca, me 71 vota për ka zgjedhur presidente të Republikës së Kosovës, Vjosa Osmani-Sadriun.

 

Pas publikimit të rezultatit të votave të raundit të tretë, presidentja e Republikës së Kosovës Vjosa Osmani-Sadriu bëri betimin para deputetëve të Kuvendit të Republikës së Kosovës, e më pas në sallë u intonua himni shtetëror i Republikës së Kosovës.

 

Me t’u zgjedhur presidente, Vjosa Osmani- Sadriu, mbajti një fjalim para deputetëve të Kuvendit.

 

Presidentja Osmani në fjalimin e saj ka dhënë një porosi për vajzat dhe gratë anembanë vendit, duke u thënë se gjithçka është e mundur kur ato ëndërrojnë dhe punojnë për realizimin e ëndrrave të tyre.

 

“Vullneti juaj qytetarë të nderuar, i shprehur më 14 shkurt dhe vendimi i sotëm i Kuvendit, më veshin me shumë përgjegjësi. Dashuria për Kosovën dhe bashkëvendësit tanë ka qenë motivimi më i madh gjatë jetës politike. Sot është dita e Kosovës, është dita juaj, ku vullneti juaj po plotësohet dhe institucionet po konstituohen plotësisht. Të dashur qytetarë, sot Kosova zgjodhi edhe një herë një presidente grua. Vajzat e kanë vendim vetëm aty ku ato vet dëshirojnë, aty ku ato çdo natë ëndërrojnë dhe për çfarë ato punojnë me zell”, tha presidentja e Republikës së Kosovës.

 

Në fjalimin e saj para deputetëve, presidentja Osmani vlerësoi lart veprën e ish presidentit të Kosovës, Ibrahim Rugova, veprën e komandantit të Ushtrisë Çlirimtare të Kosovës, Adem Jashari, të gjithë dëshmorëve të kombit dhe  sakrificën e të gjithëve për ta krijuar shtetin.

 

“Sot ne kujtojmë rolin e arkitektit të shtetit tonë, Ibrahim Rugovës, i cili politikës ia dha dimensionin më të çmueshëm të saj, dimensionin human. Historia jonë është histori e përkushtimit. T’i kujtojmë sot heronjtë tanë që lirinë e vendit e patën idealin më të çmuar jetësor. Sot kujtojmë trimërinë e komandantit Adem Jashari, secilin ushtar të UÇK-së, familjen Jashari, dëshmorët dhe heronjtë, të gjithë të pagjeturit, martirët e shumtë”, tha ndër të tjera presidentja Osmani.

 

 

Para raundit të tretë është zhvilluar edhe procedura e dy raundeve, të parit dhe të dytit. Në raundin e parë, kanë votuar 81 deputetë. Për kandidaten Vjosa Osmani-Sadriu në këtë raund kanë votuar 69 deputetë, 12 vota janë shpallur të pavlefshme, ndërsa kandidati Nasuf Bejta nuk ka marrë asnjë votë. .

 

Në bazë të këtij rezultati kryetari Konjufca konstatoi se asnjëri nga kandidatët nuk ka marrë votat e nevojshme për t’u zgjedhur president, aq sa duhen sipas Kushtetutës së Republikës së Kosovës, që rrjedhimisht duhet të mbahet edhe raundi i dytë. Në raundin e dytë në votim kanë marrë pjesë 81 deputetë. Për kandidaten Vjosa Osmani-Sadriu kanë votuar 67 deputetë, 11 vota të pavlefshme, ndërsa kandidati Nasuf Bejta ka marrë 4 vota.

 

As pas raundit të dytë, asnjëri nga kandidatët nuk mori vota për t’u zgjedhur president.

 

Në raundin e tretë të votimit kanë votuar 82 deputetë. 71 nga deputetët kanë votuar për Vjosa Osmanin-Sadriu, 11 vota kanë rezultuar të pavlefshme, ndërsa për kandidatin tjetër Nasuf Bejta nuk ka votuar asnjë deputet.

 

Nga ky rezultat kryetari Konjufca konstatoi se Vjosa Osmani-Sadriu ka marr votat e mjaftueshme për t’u zgjedhur presidente e Republikës së Kosovës.

 

Me këtë proces seanca e jashtëzakonshme për zgjedhjen e presidentit të Republikës së Kosovës e filluar më 3 prill ka përmbyllur punimet e saj.