Kuvendi i Republikës së Kosovës

Osmani: Përvoja e Kroacisë, shtysë për procesin e integrimit

06.02.2020
Sot, kryetarja e Kuvendit të Kosovës, dr. Vjosa Osmani priti ambasadoren e Kroacisë në Kosovë, znj. Danijela Barišić, me të cilën diskutuan për mundësitë e bashkëpunimit ndërmjet dy vendeve, si dhe rolin që Kroacia, si vend i cili e njeh mirë Kosovën, mund të luajë në procesin e integrimit më të shpejtë të vendit tonë në strukturat e Bashkimit Europian.
 
“Kroacia si vend i cili e ka presidencën Këshillit të Bashkimit Europian, si dhe vend mik, e kupton më së miri aspiratën e popullit të Kosovës për t’u anëtarësuar në Bashkimin Europian”, tha dr. Osmani. Sipas saj, kryesimi i Këshillit nga anëtari më i ri i Bashkimit Europian, mund të shërbejë si shtytje për t’i përqendruar energjitë tona në përshpejtimin e procesit të integrimit.
 
“Përvoja kroate mund t’i shërbejë popullit dhe institucioneve të Kosovës, për ta realizuar më shpejtë aspiratën e tij për integrim”, tha kryekuvendarja Osmani.
 
Edhe ambasadroja Danijela Barišić shprehu gatishmërinë e vendit të saj që ta thellojë edhe më tej bashkëpunimin me Kuvendin e Kosovës dhe institucionet e tjera, për ta lehtësuar integrimin e vendit tonë në Bashkimin Europian. Sipas saj, për Presidencën e Kroacisë është shumë i rëndësishëm zhvillimi i politikave që prekin regjionin.
 
Ajo e siguroi znj. Osmani se vendi i saj do ta ndihmojë Kosovën edhe në të ardhmen në të gjitha aspektet, përfshirë edhe procesin e përafrimit me Bashkimin Europian, si dhe të integrimit në të.