Lajmet e fundit

Mbledhja e Komisionit për Punë të Brendshme, Siguri dhe Mbikëqyrje të FSK-së

E Premte, 16.03.2012




Shqyrtimi i Raportit të Inspektoratit Policor të Kosovës lidhur me ngjarjet e 14 janarit, gjatë protestave të organizuara nga Lëvizja Vetëvendosje, ishte temë diskutimi e mbledhjes së sotme të Komisionit për Punë të Brendshme, Siguri dhe Mbikëqyrjen e Forcës së Sigurisë së Kosovës, të kryesuar nga nënkryetari i komisionit, Rexhep Selimi.
Anëtarët e komisionit duke paraqitur qëndrimin e tyre rreth raportit të Inspektoratit Policor të Kosovës mbi vlerësimin e kryerjes së detyrave nga Policia e Kosovës gjatë këtyre protestave, theksuan se
vlerësimi përfundimtar i komisionit do të bëhet pas përfundimit të mbikëqyrjes së zbatimit të Ligjit nr. 03/L-231 për Inspektoratin Policor të Kosovës.

Gjatë diskutimit të tyre, anëtarët e komisionit u shprehën se raporti i Inspektoratit Policor të Kosovës është voluminoz dhe gjithëpërfshirës, megjithatë paraqitën disa nga shqetësimet e tyre për mangësitë që posedon ky raport.

Me këtë rast, nënkryetari i komisionit Rexhep Selimi tha se në këtë raport nuk është mbuluar gjithë problematika, me theks të veçantë ai përmendi trajtimin e të arrestuarve pas arrestimit, si dhe mospërfshirjen në këtë raport për ndodhitë gjatë transportit të protestuesve në protesta, meqë shtoi ai ka pasur shkelje serioze.

Më tej Selimi përmendi edhe rastin e inspektorit të IPK-së, Qerim Bytyqi, i cili është përfshirë në arrestime. Selimi shtoi se ky zyrtar ka tejkaluar detyrat dhe përgjegjësitë e tij, duke shkelur rregulloren e punës së tij, si pjesëmarrës në arrestime, kurse masat të cilat shqiptohen ndaj tij janë masa për trajnim të detyrueshëm. "Kjo mund të quhet shpërblim, e jo si masë ndaj tij", tha Selimi.

Disa nga anëtarët e komisionit duke folur në përgjithësi për perfomancën e Policisë së Kosovës, gjatë protestave të 14 janarit, theksuan se meqë ka pasur numër të madh të protestuesve dhe të policëve në dy operacione të ndara që janë zhvilluar në të njëjtën ditë, është evidente të paraqitën situata në të cilat mund të pasojë tejkalimi i forcës.
"Janë ndërmarrë masa ndaj personave të cilët kanë tejkaluar kompetencat e tyre me rastin e menaxhimit të situatave në këtë ngjarje dhe këta zyrtarë do të japin përgjegjësi para institucioneve tona , gjegjësisht para Policisë", tha anëtari i komisionit Fatmir Xhelili, duke shtuar se Policinë e Kosovës duhet çmuar për nivelin e punës dhe realizmin e qëllimit që kanë pasur, por shtoi ai, nuk pajtohem me tejkalimin e autorizimit të personave zyrtar të PK-së.
Më tej, anëtari i komisionit Anton Çuni, tha se bazuar në këtë raport, janë marrë parasysh të gjitha faktet të cilat janë mbledhur në teren, nga qytetarët, mediat, filmimet e ndryshme dhe nga vet PK-ja, por shtoi ai, mungojnë disa raste për të cilat nuk jemi në dijeni pse nuk janë përfshirë në raport.
Edhe Vjollca Krasniqi, anëtare e komisionit, tha se është vërejtur fakti se gjatë 14 janarit, nuk është respektuar në mënyrë të plotë zinxhiri komandues i PK-së, ndërkaq përmendi edhe mungesën e pajisjeve të mjaftueshme të PK-së për situata të tilla, si dhe prezencen me numër të vogël të inspektorëve të PK-së gjatë këtyre ngjarjeve.

Mbledhja e Komisionit për Punë të Brendshme, Siguri dhe Mbikëqyrje të FSK-së