Lajmet e fundit

Nga mbledhja e Komisionit për Shëndetësi, Punë dhe Mirëqenie Sociale

E Premte, 15.04.2011




Komisioni për Shëndetësi, Punë dhe Mirëqenie Sociale i Kuvendit të Kosovës, mbajti sot mbledhjen e radhës, në të cilën u diskutua për gjendjen në sektorin farmaceutik në Kosovë, pas grevës njëditëshe të farmacistëve.

Në këtë mbledhje, e cila u udhëhoq nga kryetari i komisionit, Fikrim Damka, morën pjesë edhe përfaqësuesit e Shoqatës Farmaceutike të Kosovës, të Doganave të Kosovës dhe të Agjensionit të Kosovës për Produkte Medicinale.

Kryetari i Shoqatës Farmaceutike të Kosovës, Kadri Bytyçi, theksoi arsyet e grevës së farmacistëve, me ç’rast përmendi mungesën e barnave në tregun farmaceutik dhe pamundësinë, siç tha ai, të ushtrimit me dinjitet të profesionit të farmacistit, në shërbim sa më të mirë të qytetarëve. Ai potencoi, gjithashtu, se është tentuar që grevës t’i jepet konotacion tjetër karshi synimeve të saj.

Edhe përfaqësues të tjerë të shoqatës folën rreth problemeve me të cilat përballet sektori farmaceutik.

Përfaqësuesi i Doganave të Kosovës, Ibrahim Lata, pasi potencoi objektivat e doganave, e vlerësoi si problematike mungesën e barnave të licencuara në Kosovë. Ai shtroi nevojën e hartimit të një legjislacioni të përshtatshëm në këtë sektor dhe të regjistrimit të barnave, me qëllim që të lehtësohet tregtia me barna dhe qasja e qytetarëve në to, si dhe të luftohet kontrabanda.

Kryeinspektori për Produkte dhe Pajisje Medicinale pranë Agjensionit të Barnave, Haki Ejupi, foli për aktivitetet e këtij agjensioni në funksion të luftimit të barnave ilegale, të cilat, si të tilla, futen dhe shiten në Kosovë.

Anëtarët e komisionit shfaqën shqetësimet e tyre për gjendjen në sektorin farmaceutik, posaçërisht me zhvillimet e fundit dhe njëherësh ofruan gatishmërinë e tyre për të gjetur një zgjidhje të përshtatshme. Ata potencuan nevojën për t’i dhënë zgjidhje ligjore problemeve në këtë sektor, në mënyrë që qytetarët dhe farmacistët të mos pësojnë nga zhvillime të tilla.

Në të gjitha diskutimet u shtrua nevoja e rritjes së numrit të barnave të regjistruara, gjë e cila, siç u tha, do ta parandalonte tregtimin ilegal dhe kontrabandimin e barnave, që, si të tilla, paraqesin rrezik permanent për shëndetin e qytetarëve.

Anëtarët e komisionit shtruan një varg pyetjesh në adresë të të ftuarve, ndërsa u dakorduan që në ditët në vijim, të zhvillojnë takime me ministrin e Shëndetësisë dhe kryeshefin e Agjensionit të Kosovës për Produkte Medicinale.
Nga mbledhja e Komisionit për Shëndetësi, Punë dhe Mirëqenie Sociale